Monday, December 28, 2009

Kay Noynoy


Sa dilim ng gabi ng imbing karimlan,
nanulas ang sigaw sa puso ng bayan;
ang pag-asa bagang malaon ng antay,
sumibol sa gitna ng dinustang dangal.


Anupa't sumigla mga pusong uhaw,
nabuhayang loob ang laon ng patay;
mayayama't dukha nagsikapit kamay,
sa bagong umagang naaabot tanaw.

Ikaw na nga kaya ang sugo ng langit,
upang maiahon ang inang may hapis;
ang bayang lugami't sa dusa'y napiit,
matulungan kayang maibangong pilit.

Noy saiyo ngayon kami namamanhik,
tulungan mo kaming muling maibalik;
ang dangal na libong taong nakapinid,
sa kamay ng lilo't mapang-aping ganid.

Wakasan mo nawa ang mga langitngit,
ng iyak sa gabi ni'yong mga paslit;
na gutom ay dusang laging tinitiis,
at iyak ng ina ang pang-along himig.

wakasan mo nawa ang mga hinagpis,
nitong ating bayang katarunga'y pinid;
ihatol mo sana ay laging matuwid,
ng matakot silang ang puso ay lihis.

Ang sigaw sa parang iyo lang bigkasin,
at ang taong bayan agad kang diringgin;
at kung ang pawis mo sa hirap lumilim,
agad naming abot ay panyong maningning.

Sa likod mo kami lahat ng panahon,
kung sa katuwiran ika'y paroroon;
at kung ang dusa ay pilit kang ibaon,
iaalay namin buhay na tinipon.

Saturday, August 15, 2009

ANG AMYENDA

Ating Mambabatas ay lubhang balisa,
paroo't parito lahat aligaga;
setro ng batasa'y nagpapatirapa,
paglikat basalya'y agad inihanda.

Bawat kinatawan ng mga distrito,
lahat nakahandang sumagot ng "OO";
kapag ang pangala'y hanap ng pang-ulo,
nakatungayaw pang sumagot ng "AKO".

Ang bawat pagliban ay kasumpa-sumpa,
ngayong ang balakin ay inihuhulma;
ang layunin nila'y ihanda ang bansa,
sa isang malaki't balitang dakila.

Huwaran ba ito't lubhang kapitagan,
'wag kang pabubuyo aking kababayan;
pagka't katoto ko yan ay palabas lang,
kung susuriin mo'y lubhang kasukalan.

Ang motibo nila'y iyong makikita,
sa "CHA CHANG" marami ang hugis ng mukha;
ang ating saligang batas na mabisa,
balak na susuga't alisan ng tuwa.

Batas na saligan mula mapanganak,
sanggol na kawawa't di pa makausad;
marami ng agad dito ay may balak,
mapagtagumpayang mabago ang lakad.

Sino nga ba silang balakyut ang isip,
nagpasakop agad sa nais ng ganid;
tinulutan nilang sa dusa'y maidlip,
ang lupang tinirhang matagal ng gipit.

Sa pusali niyong Beatang may naknak,
hinayaang kagyat mapuspos ang habag;
tinapon sa imbing lugami't sinadlak,
ang bayang nilakhang wala na ang landas.

Sila yaong mga tusong mahahalay,
may ugaling ganid at handang pumatay;
sa batasa'y sila yaong walang humpay,
na isulong yaring amyendang mabuway.

Sarili nga lamang nilang kapurihan,
ang hangad ninumang isip ay mababaw;
sa kinang ng ginto ay agad nahubdan,
ang dangal ng lilong may lahing bayaran.

Kaya't anong uring gawang kagandahan,
ang sa piling nila'y ating aasahan;
kung ang inang baya'y handang pagkaitan;
sino pa ba kaya ang kayang pagbigyan.

Mahabaging langit kung kami'y anak din,
pakinggan mo nawa ang munting dalangin;
padalhan mo sana ng taong magiting,
na siyang dadamay sa aping lupain.

siya nawa.....siya nawa......

Monday, July 13, 2009

Sawing Pangarap ni Inang Pilipinas

Malaon ng aking ninanais-nais,
na makamtan itong pangarap kong ibig;
nguni't anong hirap sakdal na pasakit,
damdamin niyao'y di man lang maantig.

Anak kong tinawag lubha kong inibig,
pag-ibig ko ngani buhay 'kong binuwis;
binuwis ng bukal maluwag sa dibdib,
dibdib kong sinira puso kong hinapis.

tingni ngani itong lilo at sukaban,
oh mahal kong amang nasa kalangitan;
sariling anak kong lubhang mga paham,
sa pagkabalukyot at pagkagahaman.

anong sala baga ang aking binuhat,
upang magantihan nitong aking anak;
ako ngani baga'y lubha ng sukaban,
upang mga anak ako'y kalimutan.

mga anak, mga anak ako'y tingnan,
hindi nyo ba pansin ang luha kong hilam;
hindi nyo ba pansin aking agam-agam,
hindi nyo ba pansin ang kinabukasan.

sadya bang nabingi't mata nyo'y nabulag,
upang pati ako'y malimot na ganap;
hindi na natalos mga paghihirap,
mga pangarap ko't mga pagsisikap.

tamad, lilo, balakyot, sukaban... anak,
tamad, lilo, balakyot, sukaban... anak;

hindi pa ito ang katapusan......

baka sa apo ko'y mabuhay na muli,
mga pangarap kong sa anak nasawi;
baka mga apong bagong salinlahi,
ibangon na ako't ginhawa'y maghari.......

INANG PILIPINAS